Төнге фаҗигадә өч сабый һәм аларның әнисе янып үлгән

29 гыйнварда Курган өлкәсенең Юргамыш районындагы Горохово авылында янгын була. Йорт хәрабәләре арасыннан 38 яшьлек хатын, аның өч сабый баласы мәетен табып алалар. Бу турыда Россия Тикшерү комитетының Курган өлкәсе буенча Тикшерү идарәсе матбугат хезмәте хәбәр итә.

Янгын төнге ике тулганда чыга. Өйдә 2013, 2014, 2017 елларда туган сабыйлар була. Алар әниләре белән бергә янып үлә. Шушы ук йортта яшәүче ир-ат котылып кала алган.

Тикшерү органнары "бер яки аннан да күбрәк кеше үлеменә китерү" маддәсе буенча җинаять эше ачкан.

Хәзерге вакытта тикшерүчеләр фаҗига урынын карый, шаһитлардан сораштыралар. Фаҗига сәбәпләрен ачыклау эшләре бара, диелгән әлеге хәбәрдә.