Төмән өлкәсендә сугыш ветераннарына бүләк эченә каткан прәннек салганнар

Төмән өлкәсендә сугыш ветераннарына бүләккә бирелә торган азык-төлек җыелмасы эченә каткан прәннек эләгүе турында Telegram-каналларда шикаятьләр барлыкка килгән. Узган ел азык-төлек җыелмаларына карата шелтәләр килмәгәнгә күрә, быел да шушы прәннекне салган булганнар. Бу турыда «РИА Новости» га төбәкнең социаль үсеш департаментында әйткәннәр.

Абат районында яшәүче ветеранга 9 Май хөрмәтенә чәйнәп булмаслык дәрәҗәдә каткан прәннек бирүләре турында хәбәрләр челтәрдә таралган.

«Былтыр да бүләк составына Ишим җитештерүчесенең шундый ук прәннекләре салынды. Ветераннар һәм аларның туганнары ягыннан шелтәләр килмәде», — дип хәбәр иткән ведомствоның матбугат хезмәте.

Матбугат хезмәте аңлатуынча, Төмән өлкәсендә Бөек Ватан сугышында Җиңү көне уңаеннан төбәк бюджеты хисабына ветераннарга акча бирелә. Шулай ук алар Төмән җитештерүчеләреннән азык-төлек җыелмалары ала. Җыелманың составы ел саен иҗтимагый оешмалар белән килештерелә, дип аңлатканнар социаль үсеш департаментында.

Хакимият мәгълүматлары буенча, хәзер төбәктә 5,6 мең Бөек Ватан сугышы ветераны, шул исәптән 183 сугышта катнашучы, 89 элеккеге балигъ булмаган концлагерь тоткыны, 5,3 мең тыл хезмәтчәне яши.