Тәмәке тартучылар ковид белән ешрак авырыймы?
Тәмәке тартудан баш тартсагыз, иммун системагызны ныгытачаксыз һәм ковидтан сакланачаксыз, диде табиб.
Тәмәке тартучы кешеләрдә коронавирус авыр уза. Бу хакта Sputnik радиосына биргән интервьюсында Сеченов исемендәге Беренче Мәскәү дәүләт медицина университеты профессоры Андрей Демин сөйләде, дип яза РИА Новости.
Аның сүзләренчә, нәкъ менә тәмәке тарту кеше организмына табигать тарафыннан салынган эчке резервларны киметә. Тәмәке тарту сулыш системасына бик куркыныч зыян сала, дип билгеләп үтте Андрей Демин.
«Кеше тәмәке тартканда яки алкоголь кулланганда, үзен тулысынча сәламәт кебек сизсә дә, аның функциональ резервлары кискен кими. Ә организм вируслы авырулар белән очрашса, күңелсез хәлләр килеп чыга», — дип аңлатты профессор.
Әгәр кеше бу начар гадәттән арынса, организмның функциональ резервы торгызыла. Зарарлы гадәтләрдән баш тартырга һәм организмга коронавирустан сакланырга комачауламаска кирәк, дип киңәш итә Андрей Демин.
«Тәмәке тартудан үзегез генә арына алмасагыз, медикларга мөрәҗәгать итәргә кирәк. Әгәр бу гадәттән баш тартсагыз, сез иммун системагызны ныгытачаксыз һәм ковидтан сакланачаксыз», — диде Андрей Демин Sputnik радиосына биргән интервьюсында.