Түбән Камада серле рәвештә югалган Булатны волонтерлар эзли
34 яшьлек Булат Нигъмәтуллин ике көн элек эшкә китә һәм хәбәрсез югала. 3 сентябрьдә аның эшләп торган машинасы Лесная урамындагы чишмә янында табыла.
Югалган ирне 50 кеше эзли. Хатыны әйтүенчә, Булат 3 сентябрьдә гадәттәгечә балаларын бакчага илткән, эшкә киткән һәм өенә әйләнеп кайтмаган. Шалтыраткач, телефонын алмаган.
4 сентябрьдә Булатны төзелеш оешмасындагы хезмәттәшләре эзли башлый. Алар эшләп торган машинаны таба да инде. Машина ачык була, телефоннар һәм документларга да беркем дә тимәгән. Хәзер Булатны полиция дә эзли. Урманда эзләүләр бернинди нәтиҗә бирмәгән дип хәбәр итә НТР каналы.