Түбән Камада сәүдә үзәгендә пистолеттан атканнар
Түбән Камага Башкортстаннан килгән егетләр сәүдә үзәгендә атыш оештырган.
Татарстанның Түбән Кама шәһәрендә 1 мартта кичке биш тирәсендә гадәттән тыш хәл була. Сәүдә үзәгенең дүртенче катында бер ир-ат пистолеттан ата. Бу турыда полициягә хәбәр итәләр. Бирегә ашыгыч рәвештә тәртип саклаучылар килеп җитә. Бу турыда Татарстан буенча Эчке эшләр министрлыгы матбугат хезмәте хәбәр итте.
Ведомство мәгълүматы буенча, урынга килгән тәртип сакчылары җинаятьтә шикләнелүчеләрне тоткарлый. Алар Башкортстан кешеләре булып чыга. 23 һәм 37 яшьлек ике ир-ат кибеттә җәнҗал чыгарган. 37 яшьлек ир-ат исерек була, аның пневматик пистолетын алалар. 23 яшьлек егет исә газ баллончыгы белән коралланган.
«Полиция хезмәткәрләре ачыклаганча, тоткарланган кешеләрнең берсе сәүдә үзәгендә берничә тапкыр пистолеттан һавага аткан», диелә ведомство хәбәрендә.
«Хулиганлык» маддәсе буенча җинаять эше ачылган. Шикләнелүчеләр чыгып китмәү турында имза куйган.