Түбән Камада песи баласының тиресен куптарганнар һәм аякларын сындырганнар
Бу вәхшилекне күреп, ветеринарлар да шок хәлендә калган.
Түбән Кама шәһәрендә урамнан узып баручы кешеләр канга баткан песине күреп ала. Алар бичара хайванны ветеринария табибларына илтеп бирә. Бу турыда НТР каналы хәбәр итте.
Ветеринарлар, песине тикшергәч, аны кешеләр мәсхәрәләгән дигән нәтиҗәгә килә. Хайванның аяклары сынган, шул урында сөякләре тырпаеп торган. Бер аягында тиресен салдырганнар. Җенес әгъзаларын эчке яктан сыдырып бетергәннәр, диелгән әлеге хәбәрдә.
«Песинең корсагыннан йолкынып беткән эчке органнары күренә», — дип сөйләгән табиблар. Алар бу вәхшилекне күреп, шок хәлендә калган.
Кызганычка, бичара песигә ярдәм итә алмаганнар. Ветеринария клиникасына китергәч, бераз вакыттан ул үлгән.
Хәзерге вакытта активистлар вәхшиләрне эзли.
