Түбән Камада корпоратив вакытында панданы кыйнаганнар
Исерек кунак аю булып киенгән аниматорның чынлап та кешеме икәнен ачыкларга теләгән.
Түбән Камада бер оешманың Яңа ел корпоративы вакытында кунак панда киемендәге аниматорны кыйнарга ябыша.
Бәйрәм итүчеләр котырган кунакны читкә өстери, әмма «панданы» җиңел генә коткара алмыйлар. Исерек кунак аниматорның киемен ертып бетерә.
Исерек кунакны УВДга алып килгәннәр, хулиганлык өчен ул ике тәүлеккә кулга алынган. Панда ролендәге аниматор ертылган костюмын 83 мең сум дип бәяләгән һәм бу сумманы гаепледән түләтергә тели.
Исерек кунак панданы кыйнау сәбәбен: «мин ул кием эчендә чынлап та кеше бармы-юкмы икәнен белергә теләдем» дип аңлаткан.
Социаль челтәрләрдә бу ирдән «үтеп барган ел хөрмәтенә дуңгыз булганчы эчкән дә аюны кыйнаган» дип көләләр.