Түбән Камада биек йорт тәрәзәсеннән килеп төшкән сыра шешәсе кыз баланың башын тишкән
Башы яраланган кызны хастаханәгә алып килгәннәр, табиблар ярага җөйләр салган.
Узган җомгада, 26 мартта, Түбән Кама шәһәренең Бакый Урманчы урамындагы күп катлы йорт тәрәзәсеннән сыра шешәсе ыргытканнар. Шешә урамнан баручы 14 яшьлек кыз бала башына төшкән. Кызның башы яраланган. Бу турыда «Татар-информ» агентлыгы хәбәр итте.
Татарстанның Сәламәтлек саклау министрлыгының матбугат хезмәте агентлыкка хәбәр иткәнчә, баланы Түбән Кама хастаханәсенә салганнар. Аның башындагы яраны теккәннәр, бәйләп куйганнар.
«Баш мие селкенмәгән һәм имгәнмәгән. Хәзерге вакытта кыз бала хастаханәдә ята», — дип әйткәннәр министрлыкта.
НТР 24 каналы үз чыганагына сылтама белән хәбәр иткәнчә, кыз бала «РаМус» сәүдә үзәгенә таба бара торган тротуарда була. Шешә аның нәкъ баш түбәсенә төшә. Шаһитлар ашыгыч ярдәм һәм полиция чакыра.
