Түбән Кама-Чаллы юлында җиде машина бәрелешкән
Шаһитлар үлүче кеше булуын хәбәр итә.
Бүген иртән Түбән Кама-Чаллы юлында берьюлы берничә машина бәрелешкән, һәлак булучы бар. Бу турыда НТР 24 каналы хәбәр итте.
Шаһитлар белешмәсе буенча, биредә җиде автомобиль бәрелешкән, диелә хәбәрдә.
Авария һава торышы начар булу сәбәпле килеп чыгуы ихтимал. Социаль челтәрләрдә чыккан видеолардан күренгәнчә, ике машина юл кырыена төшеп киткән, тагын икесе юлга аркылы баскан. Шуңа күрә биредә бөке барлыкка килгән.
Урынга ашыгыч ярдәм, ЮХИДИ машиналары килгән. Видеодан ишетелгән сүзләрдән аңлашылганча, үлүче кеше бар.
«Татар-информ» агентлыгы хәбәр иткәнчә, һәлак булган ир-ат авариядән соң юл билгесе куярга чыккан булган. Шунда аны башка машина таптаган.
