Дагыстанда, сыер түшкәсен бүлгәләгән чакта, бер ир-атка пычак кадаганнар. Бу турыда Дагыстан буенча Эчке эшләр министрлыгы Телеграм каналында хәбәр итте.
Рутуль районында 1 ноябрьдә ике ир-ат сыер түшкәсе бүләргә керешә. Бер мизгелдә алар түшкәне дөрес иттереп бүлү турында бәхәсләшә башлый. Аннары талаш сугышка әверелә. 36 яшьлек ир-ат пычак ала да көндәшенең күкрәк читлегенә өч тапкыр кадый.
Яраланган ир-ат исән калган, хәзер ул хастаханәдә.
Җинаятьтә шикләнелүчене полиция хезмәткәрләре тоткарлаган. Ул гаебен танып күрсәтмә биргән.
Аңа карата «Алдан уйлап сәламәтлеккә авыр зыян китерү» маддәсе буенча җинаять эше ачылган, диелә бу хәбәрдә.
