Швециядә тагын бер тапкыр Коръән яндырдылар. Яндыручыны полиция саклап торган. Бу хакта Төркиянең «Хәбәр» («A Haber») телеканалы хәбәр итте, дип яза РИА Новости.
«Швециядә тагын бер кабәхәт гамәл кылынды. Башкала Стокгольмда исламга каршы булган Джейд Сандберг исемле хатын полиция саклап торганда Изге Коръәнне яндырды», – дип хәбәр итә «Хәбәр».
Акция вакытында хатын-кыз кулында хачка охшаган предмет тотып тора.
Моңа кадәр Швециянең «SVT» телеканалы, Коръән яндыра торган акция уздыруны сорап, полициягә мөрәҗәгать килгән булган. Акция 3 майда, «Евровидение» конкурсы алдыннан узарга тиеш булган.
Швециядә инде берничә тапкыр Коръән яндыру акциясе узды. Коръәнне Гыйрак флагы белән бергә яндырдылар, таптадылар. Сандберг исемле бу хатын февраль аенда Коръәнне яндырган иде инде, Швециядән исламны куарга өндәде. Ул 3 майда башка бер шәһәрдә тагын Коръән яндырырга җыена.
Швециянең премьер-министры Ульф Яльмар Кристерссон Коръәнне яндыру «урынсыз, әмма законлы» гамәл дип атады. Европа Берлеге бу акциянең мөселманнар өчен кимсетү булуын таныды, әмма фикерләр төрлеген хуплавын әйтте. Берләшкән Милләтләр оешмасы Коръәнне һәм башка изге китапларны яндыруны гаепләп чыкты.
Коръәнне яндырган Салван Момика исемле кеше Норвегиягә сәяси качу урыны сорап мөрәҗәгать итте.