Мисырның Хургада курортында дайвинг вакытында югалган хатынның 4 баласы бар. Ул бирегә Петербургтан ял итәргә килгән. Бу турыда РЕН ТВ хәбәр итте.
Турист хатын Хургада янындагы Гифтун утравы тирәсендә ире белән бергә су астына төшә. Ире арый һәм тирәнгә төшүен туктата, ә хатын тирәнрәк төшүен дәвам итә.
Мисыр басмасы белешмәсе буенча, югалган хатын тирәнлекнең тиешле чиген узып киткән.
Социаль челтәрләрдәге фотоларыннан күренгәнчә, бу гаилә су астына төшү белән мавыккан. Июльдә алар Төркиядә ял иткән. Антальядагы Тазы каньоныннан фотолар куйганнар.
Социаль челтәрдәге соңгы постлар 21 августта куелган. Мисыр басмалары, хатын 26 августта югалган, дип яза.
Хәзер эзләү эшләре бара. Экспертлар фикеренчә, хатын бик тирән төшкән, шунда ул хәтерен һәм ориентациясен югалткан.