Студентларны кимсеткән өчен медуниверситет укытучысы Гөлнара Шәймәрданованы куганнар
Биология фәннәре докторы ияге имгәнгән студент кыздан көлгән һәм хиҗап кигәнен хурлаган.
Казан медицина университетында студентларны кимсеткән өчен биология фәннәре докторы, гистология кафедрасы доценты Гөлнара Шәймәрданованы эшеннән куганнар.
31 гыйнварда Mash Iptash телеграм каналында икенче курс студенткасы Дана Лоцкихның мөрәҗәгате чыкты. Анда студентка 18 гыйнварда булган имтихан биргәндә булган вакыйга турында сөйли. Кызның 2020 елда ияге биш урыннан сынган булу сәбәпле, кимчелеге була. Укытучы аның зачеткадагы элекке фотосын күргәч, "иягең генә түгел, баш миең дә авышкан" ди. Аудиториядә хиҗаплы кызга да бәйләнә. Бер сорауга җавап бирә алмаганы өчен "син бөтен мөселманнарны хур итәсең. Бөтен милләтне. Хиҗабыңны сал", ди.
Дана елый башлагач, ул аны "елама, пластика ясатырсың да, бетәр", дип юата. Әмма инде соң була.
Гөлнара Шәймәрданова 30 дан артык хезмәт авторы, чит илләрдә хезмәтләре чыга, 2013 елда арка миен регенерацияләвен уйлап тапкан өчен диплом да ала. Ягъни, эшендә зур белгеч. Әмма, аңлашылганча, студентлар белән эшли белми.
Бу вакыйгадан соң университетта тикшерү башлана һәм шушы һәм башка студентларны кимсетү фактлары ачыклангач, укытучыны куалар.
Студент кыз канәгать булуын әйткән. "Миңа мораль компенсация дә, җинаять җаваплылыгы да кирәк түгел. Гаепле җәзасын күрергә тиеш. Киләчәктә укыта алмасын", - дигән булган кыз.