Югары суд Пленум карары проектына үз вакытында түләнмәгән штраф өчен җаваплылыктан азат итү нигезләрен кертте. Бу турыда РИА Новости яза.
«Гражданинның гаебе булмавын аның ихтыярыннан тормый торган һәм административ штрафны билгеләнгән срокта түләүгә комачаулый торган хәлләр дә раслый ала. Бу хәлләр административ хокук бозу эшен караганда судья тарафыннан тикшерелергә тиеш», – диелә документта.
Күрсәтелгән нигезләргә түбәндәге очраклар кергән:
- озак вакыт стационарда дәвалану;
- гадәттән тыш хәл зонасында булу;
- карардагы хаталар;
- реквизитларның начар укылуы.
Проектта шулай ук судның түбәндәгеләрне тикшерергә тиешлеге билгеләнә:
- шәхес банк хисапларыннан арестны алу өчен мөмкин булган барлык чараларны күргәнме-юкмы;
- штрафны түләү өчен кичектерү яки бүлеп түләү (рассрочка) соралганмы.
Пленум ахырда проектны редакцион комиссиягә эшләп бетерү өчен җибәрде, диелә хәбәрдә.
