Стәрлетмакта өч үсмер кыз машина урлаган
Кызлар «ВАЗ-2110» машинасы белән укырга барырга чыга һәм агачка бәрелә.
Башкортстанның Стәрлетамак шәһәрендә яшәүче ир-ат 14 мартта полициягә мөрәҗәгать итә. Ул кич белән «ВАЗ-2110» машинасын урамда калдыруын, шуннан машинасы югалуын сөйли. Бу турыда «Башинформ» хәбәр итте.
Хокук саклаучылар ачыклаганча, машина хуҗасы — яшь егет — кич белән 14 яшьлек таныш кызы янына килә. Кыз фатирда ике иптәше белән була. Иптәш кызларга 15 һәм 16 яшь. Егет кызлар белән кунарга кала.
Иртән кызлар уяналар да, укырга җәмәгать транспортында түгел, машинада барырга карар кылалар. Алар кунак егетнең машинасын алып китә. Тик укырга барып җитә алмыйча, агачка бәреләләр. Биредә аларны ЮХИДИ хезмәткәрләре тоткарлый. Кызларны балигъ булмаган балаларны вакытлыча тота торган үзәккә илтәләр. Кызларның икесе моңа кадәр дә административ җаваплылыкка тартылган, алар балигъ булмаган балалар эшләре буенча бүлектә хисапта торалар.
Кызлар гаебен танып күрсәтмә биргән, җинаять эше ачылган, тикшерү бара, диелә хәбәрдә.