Спорт легендасы, Олимпия чемпионы, язучы Юрий Власов вафат
Танылган спортчыга 85 яшь иде.
Олимпия чемпионы, авыр атлетика спортчысы Юрий Власов 85 яшендә вафат булган. Бу турыда стронгмен Михаил Кокляев инстаграмдагы сәхифәсендә хәбәр итте.
«Бүген иртән 85 яшендә совет спорты легендасы, язучы Юрий Петрович Власов вафат булды. Ул Җир планетасында беренче булып ике центнердан артык авырлыкны баш өстенә күтәргән кеше. Бөек, көчле һәм ачык кеше иде», — дип яза ул.
РИА Новости Россия Авыр атлетика федерациясе президенты Олег Писаревскийга сылтама белән хәбәр иткәнчә, Власов иртәнге аш вакытында үлгән. Ул иртән күңелле булган, табын артында хәле киткән. Тромб булгандыр, дип фаразлыйлар.
Юрий Власов 1960 елда Олимпиадада җиңде. Ул дүрт тапкыр дөнья чемпионы, алты тапкыр Европа чемпионы, биш тапкыр СССР чемпионы.