Сөяркәсен кисәкләргә тураклап, кислоталы мичкәдә яшергән ир күрше төбәктә качкан
Петербургта яшәүче ир-ат сөяркәсен үтереп, мәетен тураклаган да кислоталы мичкәдә яшергән. Бу турыда «Комсомольская правда» яза.
Тикшерү комитеты белешмәсе буенча, 21 сентябрьдә хокук саклау органнарына бер хатын-кыз мөрәҗәгать итә. Ул элеккеге иренең бергә яши торган хатынын вәхшиләрчә үтерүен, аннары мәетен бүлгәләп, кислоталы мичкәгә салуын әйтә.
Урынга криминалистлар бара, җинаятьтә шикләнелүче ир-атның машинасында шул мичкәне табалар. Аннары махсус полигонда мичкәне тикшерәләр һәм эчендә кеше калдыклары табалар.
Сөяркә ир-атны эзли башлыйлар. Аны күрше төбәктә табалар, диелә хәбәрдә.