Көньяк-Сахалин шәһәрендә бергә яшәүче ир белән хатын арасында җәнҗал җинаять белән тәмамланган. Бу турыда «Вести» каналы Тикшерү комитетына сылтама белән хәбәр итте.
Тикшерүчеләр ачыклаганча, 44 яшьлек хатын белән 46 яшьлек ир-ат табын корып утыра. Шул чакта хатын иренә башка ир-ат исеме белән дәшә.
Шуннан соң ир-ат ярсый, хатынны типкәләп кыйный, куллары белән суга. Хатын бик күп травмалар ала һәм урында ук һәлак була.
Ирне тоткарлаганнар. Аңа карата җинаять эше ачылган. Ул «алдан уйлап сәламәтлеккә авыр зыян китерү һәм саксызлык аркасында кеше үтерү»дә гаепләнә, диелә хәбәрдә.
