Артист, юморист Рамил Шәрапов быел Сабан туенда кулын имгәтеп, берара гипс белән йөрде. Күптән түгел ул имгәнгән кулын Балтачта сөяк утыртучы Равилә апага күрсәткән. Бу күренешне ул социаль челтәрдә күрсәтте. «Балтачка эшләр буенча барган идем, кулны да турайтып җибәрделәр! Равилә апага рәхмәт», – дип язган артист.
Видеода күренгәнчә, Равилә апа Рамилнең кулындагы төрле нокталарга басып карый һәм авырткан урыннарны эзләп таба. «Монда карама, мин үзем эшлим аны, тимим мин сиңа», – дип шелтәли халык табибы Рамил Шәраповны.
Равилә апа артистның кулында куркырлык берни дә булмавын әйтә. «Аңладым мин сине, бернәрсә дә юк монда, шундый әйбәт монда, бернәрсә дә юк», – диеп ул, Рамилнең кулын кисәк шыртлатып ала. Аннары: «Төшермә», – дип видеога төшерүчене кисәтә.
