«Сосна авылы кызы тракторны биетә» – популяр блогер кыз тракторлар ярышында катнашкан
Казанда узган «Агроволга» халыкара агросәнәгать күргәзмәсендәге тракторлар ярышында популяр блогер Гүзәл Габидуллина да катнашкан. Зифа буй-сынлы, нәфис Гүзәлнең зур трактор белән идарә итүен Татарстан Рәисе Рөстәм Миңнеханов та кызыксынып күзәткән.
«Кемгә печән кертәсе бар? Бүген беренче тапкыр КУН (махсус йөк төяү җайланмасы) белән эшләп карадым», – дип куйган ул әлеге роликны үзенең сәхифәсенә.
«Булдырасың», «Балтач районы Сосна авылы кызы, бураннар уйнатып, тракторны биетә»;
«Син бөтен нәрсәгә җитез, күзләр тимәсен»;
«Рәис үзе кул чабып тора», – дип сокланып, комментарийлар калдыралар Гүзәлгә.
Гүзәлнең тормыш иптәше – «Кызык-Мызык» дип танылган татар блогеры Илназ Габидуллин. Алар 2 малай тәрбияләп үстерәләр.
Гүзәлне трактор йөртергә әле 4 сыйныфта укыганда ук әтисе өйрәткән булган. Шул вакытттан бирле аның бу транспорт төренә мәхәббәте кимеми.
