Сосиска белән тончыккан баланы бөтен күршеләре коткарырга маташкан, тик сабый үлгән

5 февральдә Мәскәүдә 3 яшьлек бала сосиска ашаганда тончыккан һәм үлгән. Аңа бөтен подъезд кешеләре –күршеләр ярдәм итәргә маташкан. Бу турыда «Московский комсомолец» хәбәр итте.

Таҗикстанда туып-үскән күп балалы гаилә арендага алган фатирда яши. Кичке аш вакытында 3 яшьлек малай сосиска ашый һәм тончыга. Аннары ул сулыш ала алмый, бераздан зәңгәрләнеп килә. Куркуга калган ата-анасы «ашыгыч ярдәм» чакыра алмый. Атасы ярдәм сорап күршегә йөгерә.

Күрше «ашыгыч ярдәм» чакыра. Табиблар килгәнче, ярдәмгә күршедәге берничә фатирдан кешеләр җыела, алар барысы бергәләп баланы коткарырга маташа. Алар бала тончыккан азыкның бераз өлешен чыгара. Ләкин табиблар килгәнче, бала сулыш алмый башлый, аннары йөрәге дә туктый.

Урынга килгән табиблар реанимация ясаса да, бала вафат була.

Әлеге гаиләдә, мәрхүм малайдан тыш, балигъ булмаган яшьтәге тагын 4 бала бар. 36 яшьлек әниләре өйдә хуҗабикә, 38 яшьлек әтиләре биредәге кибеттә киптерелгән җиләк-җимеш сата, диелә хәбәрдә.