Мобилизацияләнеп махсус операциягә киткән Мамадыш районы Яңа Комазан авылы егете Руслан Фәләхетдинов һәлак булган.
«Батыр егетнең җәсәден кичә Ульяновскига алып кайтканнар. Бүген Яңа Комазанлылар өчен бик авыр көн... Авылдашлары нибары 24 яшендә арабыздан китеп барган Русланны соңгы юлга озата...
Мессенджерларда таралган хәбәрләр буенча, Руслан инде 11 ноябрь көнне үк һәлак булган. Элемтәгә чыкмый башлагач, якыннары Русланны «ВКонтакте» төркемендәге «Махсус операциядә хәбәрсез югалганнар» төркемендә дә эзләгәннәр. Андагы мәгълүматлар буенча, Русланның соңгы тапкыр Авдеевка районыннан шалтыратуы әйтелә. «10 ноябрь көнне яраланып, сугыш кырыннан чыгарылган булуы ихтимал. Кулында «Руслан» дип язылган беләзеге дә бар», – диелә хәбәрдә.
Фото: © https://vk.com/poisksvoruss
Май аенда, кыска вакытлы ялга кайткач, Руслан үзе укыган мәктәпкә балалар белән очрашуга да килгән.
«Мобилизацияләнгән, бүгенге көндә ялга кайткан авылдашыбыз Руслан Фаләхетдинов белән җылы очрашу булып узды. Укучылар сорауларын бирде, Руслан һәрбер сүзен уйлап кына җавап кайтарды. Укучыларга тырышып укырга, спорт белән шөгыльләнергә, туган якны, туган мәктәпне яратырга өндәп калдырды», – диелә бу турыда социаль челтәрләрдәге хәбәрләрдә.
Фото: © https://vk.com/kyukerksa
Русланның якты истәлегенә якыннары һәм дуслары видеоролик ясаган. «Ватсап» төркемнәрендә таралган, «Сау бул, әнкәем» дигән юллары булган, җырга салынган фотоларны күз яшьләрсез карап булмый.
Түбәндәге видеоны исә дуслары Русланның туган көненә ясап җибәргән булган. Русланга 8 ноябрь көнне генә 24 яшь тулган.
Руслан Фәләхетдиновның якыннары һәм туганнарының авыр кайгысын уртаклашабыз.