Ятим үскән Җәмилә әнисенә багышлап җыр язган: «Әнисез калган нарасыйлар дөнья тулы»

Финляндиядә яшәп, иҗат итүче Җәмилә әнисенә багышлап җыр иҗат иткән.

Җәмилә әбисе белән үсә, ул кечкенә чакта әти-әнисе аерылыша, бераздан ул әнисен дә югалта. Әтисен ул озак еллар узгач, Финляндиягә кияүгә чыгып, үзенең балалары булгач кына эзләп таба. Бераздан аның әтисе дә вафат була.

«Бу җыр минем хакта гына түгел. Ятим, әнисез калган нарасыйлар дөнья тулы. Аларга әйтәсе сүзем: бирешмәгез, егылганда да торып басыгыз», — дип язган Җәмилә үзенең Инстаграм битендә.

«Ялгыз калдым, бөтен җиһан

Бер мизгелдә бушап калган күк.

Әнкәм китте, һәр сулыштан

Тамчы-тамчы сагыш тамган күк.

Яр буенда мин яп-ялгыз,

Әнисез калган бер кыз, бер кыз

Сагышым тулы диңгез,

Бик авыр, әнкәм, синсез.

Миңа синсез…

Әнкәй, бәгырем, кулларыңны

Үбәр идем алып учларыма.

Ятим җаным юатасым килсә,

Ал син, диңгез, мине кочагыңа», — дип җырлый ул «Әниемә» дип аталган яңа җырында.