Мәскәүнең Домодедово аэропортында 1 пассажир качып кына «Airbus A321» самолетының багаж бүлегенә кереп утырган. Чөнки ул рейсына соңга калган, әмма бик тә китәргә теләгән. Ләкин ул, ялгышып, башка шәһәргә бара торган самолетка эләккән.
«Mash» Телеграм-каналы мәгълүматлары буенча, кичә 41 яшьлек Андрей К. «S7 2625» рейсы белән Новокузнецк шәһәренә китәргә тели. Тик өлгерми кала. Шуңа күрә, чемоданга «әйләнеп», самолетның багаж бүлегенә керә. Әмма бу – Норильскига китәргә әзерләнгән «S7 2581» рейс самолеты булып чыга. Бу вакытта инде Андрей утырырга тиешле самолетның ансыз гына Новокузнецкига очып китүенә 1 сәгатьтән артык вакыт узган була.
Ахыр чиктә, ир-атны абайлап алалар һәм тоткарлыйлар. Кинологлар һәм башка белгечләр 1 сәгать эшләгәннән соң, самолет Норильскига очып китә. Андрейны хокук сакчылары алып киткән.