![Шоколадлы печенье рецепты](https://intertat.tatar/resize/shd/images/uploads/news/2023/8/2/ed9e49fe2376fd36632544d735834d11.jpg)
Өйдә кул астында булган азык-төлектән дә чәй янына тәмле печеньелар пешереп була. Шоколадлы печенье рецепты белән «Атна вакыйгалары» газетасы бүлешә.
Камыр өчен кирәк: 3 йомырка (бүлмә температурасында булсын), 150 грамм шикәр комы, 50 грамм көнбагыш мае, 60 грамм какао порошогы, 120 грамм тирәсе он, 1 чәй кашыгы камыр көпшәкләндергеч (разрыхлитель), 1 чәй кашыгы каһвә, ванилин, бер чеметем тоз.
Бу камырдан 12 зур яки 24 кечкенә печенье пешерергә мөмкин.
Шикәр, какао, тоз, көнбагыш мае, каһвә, винилинны кушып бутыйбыз. Аннан соң йомыркаларны берәм-берәм салып болгатабыз. Он һәм көпшәкләндергечне бергә кушабыз да, әз-әзләп камырга салып бутыйбыз. Камыр каймак куелыгында була.
Әзер камырның өстен каплап 2 сәгатькә суыткычка куябыз. Ашыкмасагыз, төнгә суыткычта калдырырга була. Ашыксагыз, 30-40 минут туңдыргычта тотарга мөмкин.
Суынган камыр куерып китә. Аны кашык белән алып, кулда шар кебек әвәләп һәм шикәр онына батырып, пергамент җәелгән табага тезәбез. Бер-берсеннән күпмедер ара калдырырга кирәк, чөнки печеньелар пешкәндә кабарып зурая.
Печенье 180 градуслы мичтә, зурлыгына карап, 8-12 минут пешә.