Илсөя Бәдретдинованың Таиланд маҗаралары дәвам итә. Җылы якларга сәяхәте вакытында ул сторисларында үзенең кайда йөргәннәрен күрсәтеп бара. Бу көннәрдә җырчы Леонардо Ди Каприо белән «Пляж» триллеры төшерелгән Майа Бэй бухтасына барды, бирегә язарга ярамаган шоу да карады. Инде чират елан фермасына җиткән. Ул еланнар, кобралар карарга барырга пляжда кызынып яту теләге белән янган дусты Гүзәл Карамиеваны да күндергән.
Сәяхәтчеләр фермага арендага алынган машинада юл тотканнар. Машина бәясе тәүлегенә 4500 сум (11000 сум депозит калдырганнар).
«Ну че, без килеп җиттек. Планнар зурдан: елан канын эчәргә, елан ите ашарга, еланнан ясалган дару алырга», – дип яза ул беренче сторисларында.
Туристларга еланнарның кайда үрчетелгәнен күрсәткәннәр. Илсөя кобрадан ясалган дару да сатып алган. Бу дару холестерины югары булган, гастрит белән интеккән кешеләр өчен бик файдалы икән. Бер кабы 100 доллар тора.
Алга таба җырчы шок-контент керткән. Мәңге яшь калу, иммунитетны ныгыту өчен, аңа елан йөрәге ашап, елан каны эчәргә тәкъдим итәләр. Бер кеше стаканга еланның канын агыза, икенче стаканда исә яңа гына үтерелгән еланның йөрәге тибеп ята…
«Кобраның ярты йөрәген ашарга һәм каны белән йотып җибәрергә кирәк. Бу – махсус ферма, биредә бу эшләр законно эшләнә. Миндә хәзер 2 йөрәк һәм кобра каны», – дип эчеп куйгач: «Кан исе дә, тәме дә килмәде, әз генә баллы эчемлек кебек», – дип бәя бирә Илсөя бу «сый»га.
Йөрәген ашау һәм канын эчү өчен бер кобра сатып алу артистка 300 долларга, ягъни 25500 сумга төшкән.
Соңыннан туристлар шул ук кобраның ите белән сыйланган.