Шойгу: Авдеевкада Россия армиясе дошманны үз позициясен калдырып качарга мәҗбүр итте

Россиянең саклану министры Сергей Шойгу Владимир Путинга Авдеевканы азат итү һәм Авдеевка юнәлешендәге вазгыять турында сөйләгәннәрдән төп фикерләрне тәкъдим итәбез.

Авдеевкадагы Коксохимия заводы азат ителгән. Шәһәрне азат иткәннән соң, һөҗүм көнбатыш юнәлештә дәвам итә, 72 квадрат метр җир азат ителгән.

Россия Кораллы көчләре, Авдеевканы азат иткәндә, тәүлегенә 450гә кадәр югары төгәллекле авиаһөҗүм ясаган.

Авдеевкада җир асты линияләре булган ныгытылган район 9 ел буе төзелгән, монда Украина Кораллы көчләре каршылыгын җиңү – уңыш.

Украина Кораллы көчләре Авдеевкадан киткәндә, бик күп яралы солдатлар, корал һәм миналанган урыннар калдырган.

Авдеевканы азат итү операциясе Саклану министрлыгы дәреслекләренә керәчәк.

Генераль штаб Авдеевканы алу операциясен минималь югалтулар белән башкарып чыга алды.

Авдеевкада Россия армиясе дошманны үз позициясен калдырып качарга мәҗбүр итте.

Украина гаскәрләренең Авдеевкадан чигенүе оештырылган түгел, алар яралыларны, техниканы калдырып киттеләр, юллардан, кырлардан бардылар.

Украина контрһөҗүм вакытында бик зур көчләр җәлеп итте, әмма Россия оборонасының беренче линиясенә кадәр дә барып җитә алмады, ә алга таба тагын ике линия бар.

Киев 166 һәлак булган солдат, 800дән артык танк, 2400 бронетехника машинасы, «Леопард»ларның яртысыннан күбрәген, 123 самолет һәм вертолет югалтты.

Россия, Украина контрһөҗүменә каршы тору өчен, зур, катлаулы хәрби эш башкарып чыкты.

Хәрби хәрәкәтләр озаграк дәвам иткән саен, Россия армиясе шулкадәр яхшырак җиһазландырыла һәм тәҗрибәлерәккә әйләнә. 2023 ел йомгакларыннан командирлар һәм подразделениеләр дәрәҗәсенең никадәр үсүе күренә.

Владимир Путинның төп фикерләре:

Авдеевкадагы вазгыять, һичшиксез, уңыш, әмма аны үстерергә кирәк. Үсеш яхшы әзерләнгән, шәхси состав, корал, техника һәм сугыш кирәк-яраклары белән тәэмин ителгән булырга тиеш.

Россиянең барлык хәрбиләре дә кыюлык һәм батырлык күрсәтте, илнең һәм халыкның алар иң югары бүләкләренә, мактау һәм рәхмәт сүзләренә лаек.

Шәһәрне азат итүдә «Ветераннар» төркеме аерым өлеш кертте. Аларның операциясе Россия мәнфәгатьләрен яклаудагы хәрби хәрәкәтләр тарихында аерым сәхифә булды.

Россия халыкара конвенцияләр нигезендә хәрби әсирләрне лаеклы тота, Авдеевкада әсирлеккә алганнары белән дә шулай ук эшләргә кирәк.