![Согуд Гарәбстаны футбол чемпионаты хакына илдә хәмер эчүгә рөхсәт бирергә җыена](https://intertat.tatar/resize/shd/images/uploads/news/2023/11/7/886271806d8bb99235058d0f699eaca7.jpg)
Согуд Гарәбстанында узачак 2034 елгы дөнья чемпионаты вакытында бу илдә алкоголь кулланырга рөхсәт итәргә җыеналар. Искәртеп үтик, Согуд Гарәбстанында алкоголь сату һәм куллану тыелган, хәтта чит ил кешеләренә дә алкоголь куллану өчен штрафлар, тән җәзалары, төрмә яки депортация яный.
Ә бүгенге көндә Согуд Гарәбстаны турнирны уздыруга бердәнбер кандидат булып тора, чөнки Австралия гариза бирүдән баш тарткан.
«The Sun» чыганагы хәбәр иткәнчә, фанатларга кунакханәләрдә һәм махсус фанзоннарда алкоголь сатып алырга рөхсәт ителәчәк. Басма язуынча, карар кабул ителгән инде. «Моны халыкка чыгармыйлар, ләкин бу – танылган факт», – дигән басманың әңгәмәдәше.
Согуд Гарәбстаны моңа кадәр, әгәр ил 2034 елда Футбол буенча дөнья чемпионатын уздыру хокукына ия булса, җанатарлар трибуналарда сыра эчә алачак, дип вәгъдә иткән булган.
2023 елның декабрендә Согуд Гарәбстаны футбол буенча дөнья клуб чемпионатын кабул итәчәк.
Сүз уңаеннан, 2022 елда Футбол буенча дөнья чемпионаты Катарда узды, анда сыра сатуны тыю карары турнир ачылуга берничә сәгать кала кабул ителгән булган.