Согуд Гарәбстанында ел саен дөяләр фестивале уза. Приз фонды - 57 миллион доллар - 3 миллиард 200 миллион сум тирәсе. Конкурста гауга чыккан. Дөяләре җиңсен, матур булып күренсен  өчен кайберәүләр хайваннарның иреннәрен калынайтып, ботокс ясаткан булган. Кайбер дөяләргә исә, косметика кулланып макияж ясаганнар, дип хәбәр итә "Известия".

Ботокс ясаткан дөяләрне матурлык конкурсыннан куып чыгарганнар. Матурлык бәйгесен оештыручылар фикеренчә, дөяләр табигый булырга тиеш. 

Ботокс (ботулотоксин) — дәва препараты, ул нервлардан мускулларга сигнал килүне тоткарлый. Ботокс инъкциясе алгач, мускуллар йомшара һәм җыерчыклар тигезләнә, тире шома булып күренә башлый.