Сөембикә манарасындагы ярымайны яңартуга 60 граммнан артык сусаль алтын тотылган

Реставрациядән соң Сөембикә манарасына урнаштырылган ярымайның алтын йөгертелгән катламын яңартуга 60 граммнан артык сусаль алтын тотылган. Бу хакта «Татар-информ» агентлыгына реставратор-алтын йөгертү остасы Борис Симаков сөйләгән.

«Без иске алтын катламын, бакырга кадәр тулысынча алып ташладык, аннары яңасын ясадык. Бу эштә иң мөһиме – сабырлык һәм түземлек», – дигән ул.

Белгеч сүзләренчә, яңа алтын катлам якынча 20 ел хезмәт итәчәк. Моннан тыш, конструкция тулысынча каткач, аңа һава шартлары да, кошлар да зыян китерә алмаячак.

• Сусаль алтын – төрле өслекләрне (мәсәлән, гөмбәзләрне, рамнарны, сәнгать әсәрләрен) алтынлау өчен кулланыла торган бик юка (якынча 100 нанометр калынлыктагы) чын алтын табаклар.