Сочида диңгез ярында йөргән яшьләрне дулкын алып кереп киткән: кыз югалган, егет котылган

Сочида «Ривьера» пляжында йөргән яшьләрне дулкын диңгезгә алып кереп киткән. 20 яшьлек кызны таба алмыйлар, егет котылып калган.

Липецкидан килгән яшьләр котырынган диңгез ярында аякларын чылатып йөргән. Видеодан күренгәнчә, бервакыт кыз ярга борылмакчы була, егет аны дулкыннарга таба этәрә. Аннары кыз үзе егетне дулкыннарга якынрак барырга тарта.

Зур дулкын аларны аяктан ега, аннан соң килгәне икесен аера – егет ярга якынрак кала. Өченче дулкыннан соң инде кыз бөтенләй күренми. Егет аны тапмакчы булып бәргәләнә, әмма инде кыз бүтән чыкмый. Парны күргән кешеләр дә алар янына килгән, әмма булыша алмаган.

«Без өметләнеп көтәбез. Алар дуслары белән киткәннәр иде. Ялга барыр өчен акчаны озак җыйдылар, бөтен булган тиеннәрен берләштереп киттеләр», – дип сөйләгән кызның танышлары «Комсомольская правда»га.