Татар Малай: «Әтием белән әнием коронавирусны җиңде!»

Беренче татар инстаблогеры Татар Малай (Ринат Галиәхмәтов) якыннарының коронавирус белән авыруы хакында хәбәр итте.

Татар малай Инстаграм битендә гаиләсе белән төшкән фото урнаштырган. «Әтием белән әнием коронавирусны җиңде. Туганнар белән булганда һәр минутның кадерен белегез!» — дип язган ул.

Татар малайның әти-әнисе Түбән Кама шәһәрендә яшиләр.

Блогерның әнисе Әлфия Галиәхмәтова да Инстаграм битендә фото урнаштырган. «Шушы минутта бездән дә бәхетле кеше юктыр, барыбыз да сау-сәламәт, бәхетле булыйк», — дип язган ул.

Инстачыларны коронавируска бәйле сораулар борчыган.

«Коронавирустан нинди дарулар эчтегез?» — дип кызыксынган берсе.

«Табиб чакыртыгыз. Ике тапкыр табиб килде, ике тапкыр ашыгыч ярдәм машинасын чакырттык, миннән өч тапкыр, әтисеннән ике тапкыр анализ алдылар. Температурагыз булса, парацетамол гына эчегез», — дип җавап биргән Әлфия Галиәхмәтова.

«Каты авырдыгызмы? Сезнең өчен шыпырт кына борчылдым, язарга гына оялдым. Исән-сау булырга язсын!» — дигән тагын бер инстачы.

«Үзебезгә авыр тоелды инде, рәхмәт», — дип язган Татар малайның әнисе.

«Бик тату гаилә! Сәламәт булыгыз!», «Нык шәп чыккансыз», «Киләчәктә дә һәрчак шулай гөрләп, мәхәббәттә, бәхеттә, бер-берегезгә таяныч булып яшәргә язсын!» — дип яза блогер гаиләнең виртуаль дуслары.