Актриса Лариса Гузеева коронавирус йоктырган
Алып баручыны хастаханәгә салганнар.
![Актриса Лариса Гузеева коронавирус йоктырган](https://intertat.tatar/resize/shd/images/uploads/news/2021/9/29/6febad29d21f6d89053fbc77e69ad78b3f595653a4ccd5c197b204af2471.jpg)
Беренче каналдан бара торган «Давай поженимся» тапшыруы алып баручысы Лариса Гузеева коронавирус белән авырый.
Актриса бу хакта үзенең инстаграм сәхифәсендә язып куйган: «Минемчә, сәламәтлек — бик интим, шәхси тема. Хәлем турында бөтен дөньяга сөйләргә мин Сталин түгел бит. Мин шул зәхмәт белән авырып киттем. Дәваланам. Бөтенегездән дә үтенеп сорыйм: миңа һәм гаиләмә шалтыратмагыз. Үтенеп сорыйм. Үзегезне минем урынга куеп карагыз. Миңа болай да куркыныч. Аңлавыгыз өчен рәхмәт», — дигән ул.
Лариса Гузееваның дуслары аңа сәламәтлек һәм тизрәк терелүен теләп калган.
«РИА новости» хәбәр иткәнчә, 27 сентябрьдә актрисаны Коммунарка бистәсендәге 40нчы номерлы хастаханәгә салганнар булырга мөмкин. Лариса Гузееваның кызы Ольга Бухарова: «Әни белән барысы да тәртиптә. Мондый сорауларга җавап биреп арыдым инде», — дигән.