Дилә Нигъмәтуллина Кырымда кызы һәм кайнанасы белән ял иткәндә маймылдан зыян күргән

Җырчы ялда төшкән фотоларын истадусларына күрсәтеп бара.

Дилә Нигъмәтуллина Кырымдагы ял фотоларын инстадусларына күрсәтеп бара. Җырчы анда кызы Сәфинә, кайнанасы һәм кайнанасының бертуган апасы белән ял итә.

Дилә виртуаль дусларыннан экскурсияләр буенча киңәшләр дә сорап яза, соңыннан рәхмәт әйтергә һәм хис-кичерешләре белән уртаклашырга да онытмый.

Шундый экскурсияләрнең берсе күңелсез тәмамланган.

«Сафари-паркны йөри генә башладык, телефон утырды. «Пауер банк» бар икәне искә төшкәч, зарядкага куйдым. Килеп җиттек шундый «тәти» шимпанзе янына. Ул шундый «милашка», ничек инде аны видеога төшермичә каласың. Телефонны якынайтып, ашаганын төшерә башлаган идем, чыбыкны эләктереп алмасынмы! Җибәрми генә бит, малай. Тарта-тарта бармаклар авыртып бетте. Тәки өзеп чыгарды. Шуның белән безнең съемка тәмамланды. Айфоным саубуллашып, йокыга китте. Аның белән безнең кәеф бозылмады, әлбәттә. «Тайган» паркы бик ошады. Без күргәннәрнең бөтенесе дә сурәттә калмаса да, күңелдә калды», — дип язган җырчы.