Гүзәл Уразова җәнлек үләксәсе белән килеп чыккан хәл турында: "Чүпрәк бит бу!"

Гүзәл Уразова җәнлек үләксәсе белән килеп чыккан хәл турында: "Чүпрәк бит бу!"
Гүзәл Уразова белән Фирдүс Тямаевның юлда яткан хайван үләксәсеннән көлүләре зур гауга куптарды. Татарстанның атказанган артисты Тямаев һәм халык артисткасы Уразова турында бүген федераль мәгълүмат чаралары да язып чыкты.

Исегезгә төшерәбез, вакыйга болай булды: Гүзәл Уразова инстаграмга куйган роликта алар Фирдүс белән бергә юлда басып торалар. Алар янында әллә төлке, әллә эт үләксәсе ята. Артистлар көлешә.

"Шашлык ясарга өлгермәдек", - ди Гүзәл.

"Үзегез беләсез, гастрольгә барабыз, ашыйсы килә. Шуңа күрә Гүзәл белән тукталдык", - ди Фирдүс.

"Сөйләмә инде, кеше ышандырырсың", - ди Гүзәл.


Тик күпләр артистларның юморын аңлап бетермәгән.

"Бер кызыгы да юк, кошмар", "Сорарга да оялам инде, монда кайсы җире кызык соң?", дип ачулана инстачылар.

"Юлда бәрдереп киткән хайван, ә сезгә кызыкмы? Коточкыч. Аннары балалар песиләрне, этләрне үтерә дибез", дип тәнкыйтьлиләр. 

Тәнкыйтькә журналистлар да кушылды. 

Бүген Гүзәл Уразова, 800 километр юл үтеп, кабат теге урынга килгән. Гүзәл бу урынны видеога төшерә. Инстаграмда биш кисәк видео урнаштырган.

"Уйнап сөйләшкән сүздән ниндидер начар әйбер чыгардылар. Юлда җәнлекме, чүпрәкме ята иде. Чүпрәк булгач, шаярттык инде. Фирдүс аны соңыннан читкә алып куйдым диде. Аның хайван түгел икәнен күрәсем килә", - ди видеосында Гүзәл һәм юл читендә теге "чүпрәк"не эзли башлый.

Чүпрәк чыннан да табыла.

Гүзәл инстаграм аркылы мөрәҗәгать итә: "Менә күрәсезме, дуслар, сез Фирдүс белән миңа нахакка шундый начар сүзләр җиткердегез. Мин Ходай Тәгаләдән сорыйм, миңа начар сүзләр җиткергән кешегә Ходай Тәгалә үзе шундый сүзләр җиткерсен иде", - ди Гүзәл.


Кичә бу хәлдән Фирдүс Тямаев да гафу үтенгән иде. Ул исә чүпрәк турында түгел, хайваннар турында сөйләде. Фирдүснең сөйләвендә "чүпрәк" дигән бер сүз дә юк. 

"Гүзәл Уразова белән шаярып видео куйган идек, журналистлар язып тутырганнар, "ике артист җәнлекне мыскыл итеп көлә, иманнары юк" дигәннәр. Кемнәр минем шаяруны аңлый, алар аңлаган. Без бит юлда кафега керсәк, "бу эт итеннәнме, песи итеннәнме" дип шаяргалыйбыз. Бу да шундыйрак шаяру иде. Бәлки минем шаяруым урынсыз да булгандыр. Кемнәр шаяруны аңламый, мин Гүзәл исеменнән дә, үз исемемнән дә гафу үтенәм", - дип сөйли Фирдүс.

Тямаев үзенең этләр, песиләр яратуын әйтә. "Мин аларны һәрвакытта да ашатам, эчертәм, алар белән аралашам, танышам, сөйләшәм", - ди ул.

"Өемдә ау мылтыгы бар, минем аңардан бер тапкыр да атканым юк, чөнки мин тавык суярга да куркам. Шуңа күрә берүк мине дөрес аңлагыз. Бу шаяру гына булды", - ди Фирдүс Тямаев.

Халыкның "җәнлекләрне мыскыллаганнар" дигән сүзенә Фирдүс каршы килә. "Без аны таптатмадык, өстендә биемәдек, өстенә басып җырламадык, типкәләп йөрмәдек, ахырдан без аны әле алып та куйдык", - дип сөйли ул.

"Язуын язганнар... Тик бер дә ике ел элек абыемның сарае янганда, сарайга кереп, ике сарык белән этне коткарганны бер дә язмаганнар. Исән-сау булыгыз, аңлавыгыз өчен сезгә бик зур рәхмәт", - дип тәмамлый сүзен Тямаев.

Шулай да бер сорау туа: чүпрәкме, җәнлекме? Сез ничек уйлыйсыз?