Роберт Миңнуллинның соңгы шигыре: «Күрдем»
Халык шагыйренең соңгы шигыре туган ягы хакында.
Бүген төнге өчтә халык шагыйре Роберт Миңнуллин вафат булды. Ул соңгы елларда шигырьләрен Инстаграмга элеп бара иде. «Интертат» аның Инстаграмга элгән соңгы шигырен тәкъдим итә.
Күрдем…
Мин тауларны бик күп күрдем.
Күрдем бик биекләрен.
Таулар күрсәм, ни өчендер,
Җилкенә йөрәкләрем…
Кайсын үзем эзләп бардым,
Очрады каршыма да…
Кайсына җәяүләп мендем,
Кайсына — машинада…
Күрдем мин Балкан тауларын,
Хәтта Альп тауларын.
Мин ул Альп тауларының
Чирәмендә аунадым…
Араратларын да күрдем,
Күрдем Ирәндеген дә.
Ул тауларның горур сыны
Күз алдымда бүген дә.
Күрдем мин Каф тауларын да,
Күрдем Алатавын да.
Белмим, күрә алырмынмы
Ул тауларны тагын да…
Тартып торса да күңелне
Чит җирләрнең тау-ташы,
Минем өчен иң биек тау
Сөн буеның тау башы.
