Чаллыда быел беренче тапкыр «патша игезәкләре» туды

Кыз һәм малай бергә дөньяга килгән очракны шулай атап йөртәләр.

Чаллы шәһәрендә 2020 елда беренче тапкыр «патша игезәкләре» — берьюлы малай һәм кыз бала туган. Бу турыда «Челнинские известия» хәбәр итте.

Кичә сабыйларны һәм бәхетле ананы бала тудыру йортыннан чыгарганнар.

Бәхетле очрак Сәйфуллиннар гаиләсендә була. 14 гыйнварда Рамил һәм Алинә гаиләсендә игезәкләр туа. Сабыйларга Илсөя һәм Илдан дип исем кушалар.

Илсөя — ил, халык сөя торган, үзе дә илен һәм халыкны ярата торган дигән мәгънәдә. Илдан исеменең мәгънәсе Борынгы Фарсы илләренә тоташа, төрки телләрдә очрый. Ул илгә дан, мактау мәгънәсендә, диелә бу хәбәрдә.

Инстаграмдагы хәбәр янына комментарийлар язганнар. Бертавыштан сәламәтлек телиләр, Рамил белән Алинәгә бәхетле гаилә булып яшәргә язсын, диләр.