Ләйсән Таишева авырлы килеш 40 градус температура белән чирләгән
ПЦР-тест тискәре нәтиҗә күрсәтү белән Ләйсәнне хастаханәдән өйгә чыгарганнар.
Җырчы Римма Ибраһимованың кызы Ләйсән Таишева җитди генә чирләп алган. Бу хакта ул инстаграмда яза.
«Барысы да кич белән башланды. Йөреп кайтканнан соң, хәлсезлек тойдым. Ардым дип уйлаган идем, ләкин төнлә температурам күтәрелде. Алдагы ике көндә температура бер төшеп, бер менеп, даими уйнап торды. 40ка кадәр күтәрелгәч, ашыгыч ярдәм чакырдым.
8 сәгать көткәннән соң, мине бер хастаханәдән икенчесенә йөртә башладылар. Төрле анализлар тапшырдым, тестлар, УЗИ үттем. Барысы тиешле нормада иде. ПЦР-тест тискәре нәтиҗә күрсәтү белән, мине өйгә кайтарып җибәрделәр.
Бу ни булды? Табышмак! Кечкенә кызчыгыбызның безнең күңелсез көннәребезне хис-кичерешләргә баетасы килде, ахры.
Иң мөһиме — хәзер минем һәм бала белән барысы да тәртиптә. Башка мондый сюрпризлар булмас дип ышанам», — дип язган Ләйсән.
Ләйсән Таишеваның икенче бәбиен көтүе турында язган идек.
Инстачылар Ләйсәнгә тагын 3 атнадан антитәнчекләргә тест биреп карарга киңәш иткән. Шулай ук авырлы вакытта инстаграмга артык матур фотоларын куймаска өндәгәннәр. «Күз тия сиңа, кызый», — дип куркытмакчы булганнар.