Алып баручы Марсилә Искәндәрова кайнанасын елаткан

Марсилә белән тормыш иптәше әниләренең туган көненә әйтмичә кайтып төшкәннәр. 

Алып баручы Марсилә Искәндәрова инстаграм сәхифәсенә бик матур, ихлас видео урнаштырган.

«Кичә сториска шушы видеоны куйганнан соң, директ шартлый язды. Бөтен инстадусларыбызны елатканбыз бит. Нечкә күңеллеләр күп икән арагызда. Монда калсын әле, истәлек булып. Үз әниеңме дип тә сорадылар. Кайнанам», — дип яза Марсилә. 

«Әнинең туган көнендә без эшләдек. Ул кайтуыбызны көтмәде. Эшләрне җайлап, әйтмичә генә кайтып төштек. Шуңа күңеле тулды әнинең», — дип аңлата ул бу җылы видеоны. 

«Еладык шул. Әти-әниләргә күп кирәкми. Әнә шундый кадер-хөрмәт булса, шул җитә»;

«И, Марсилә, ничек итеп кочаклап, иреңнең әнисен хөрмәт итәсең бит. Рәхмәт сиңа, минем дә күңелем булды шундый»;

«Еладык, шатлык күз яшьләре коелды. Шундый кешелекле, әни дип өзелеп торучы килен. Бик бәхетледер әниегез. Яхшылыгың үзеңә меңе белән кире кайтсын. Олы кешегә күп кирәкми»;

«Малай үстергән аналарның зур бәхете — кешелекле, миһербанлы киленнәр. Малайлар бит алар үзләренчә яраталар — авыр эштә булыша, күчтәнәчен алып кайта. Ә килен ихтирамы икенче. Шулай булып кал, Марсилә. Балаларың да шундый яхшы күңелле булыр, Алла боерса», — дип яза Марсиләнең виртуаль дуслары.