Салават Миңнеханов белән Гүзәлем клибында төшкән бабай вафат

Салават Миңнеханов белән Гүзәлем клибында төшкән бабай вафат
Салават Миңнеханов белән Гүзәлемнең "Кил, кил", "Ай яй, яй" клипларында төшкән Язкәр бабай вафат булган. Бу турыда җырчылар икесе инстаграмдагы сәхифәләрендә язды.

"Барыбыз өчен дә үрнәк булган, хөрмәт иткән, яраткан клип героебыз Язкәр бабай бүген арабыздан китеп барды. Урыны оҗмахта булсын. Аеруча безнең гаилә өчен мәңгегә истә каласың. Барысы өчен рәхмәт", - дип яза Салават Миңнеханов.

 
 
"Әй бу дөнья дигәнең... Әле генә бәхет дулкынында коендыра да, шул арада хәсрәт диңгезенә дә илтеп ыргыта икән! Буген, туганыбыз кебек якынайган, үз бабаебызга әйләнгән, "Кил,кил", "Ай яй, яй"клипларыбызның героеның берсе, гомере буе Азнакайның Чалтаймас авылында яшәп, бөтен егәрен, сәламәтлеген туган авылы усешенә багышлаган, тырыш-уңган, эчкерсез һәм киң күңелле, үрнәк гаиләсе белән, клипларны караган 5 миллион 200 мең тамашачы мәхәббәтен яулаган, күпләрне сокландырган парның берсе - Тәслия әбинең хәләл җефете Язкәр бабабыз бакыйлыкка күчте. 

Без, мәрхүмнең балаларының, оныкларының һәм Тәслия әбиебезнең олы хәсрәтен уртаклашабыз! Кемнәр Язкәр бабайны хәтерли - бергәләп аның рухына дога кылыйк! Урыны җәннәт түрендә булсын берүк! Амин!" - дип яза Гүзәлем.