«Ач күзләреңне» - Рината Тей иренә багышлап җыр иҗат иткән

Рината Тей әлеге композицияне хәзерге вакытта тернәкләнү чорын үтүче, яшәү өчен көрәшүче тормыш иптәшенә багышлавын хәбәр итте.

Җырчы Инстаграм битендә гаилә мизгелләре белән тулы матур видео урнаштырган. «Бер көн, бер мизгел эчендә бөтен тормышыбыз үзгәрде дә куйды. Әле кичә генә без бик бәхетлеләр, тормыш гөрли иде… Бер вакыйга һәм бөтен нәрсә арткы планга күчә. 25 октябрь. Көрәш, авыртулар, күз яшьләре, реанимация. Мин синең белән, аяк астымнан җир югала, тик мин көчле, чөнки син мине нәкъ шундый иттең. Янәшәңдә утырып, күзләреңә карыйм, йөрәгем елый, «Ач күзләреңне, миңа синсез авыр, ач күзләреңне», — дип кабатлыйм. Сәгатьләр, көннәр, атналар, айлар һәм мин синең мәхәббәт белән тулы ачык күзләреңне күрдем. Изге Рамазан аенда синең сүзләреңне ишеттем. Нәкъ менә бүген, 23 май, синең туган көнеңдә сиңа багышлап язылган җырымны тәкъдим итәм. Бәхетле көннәрнең берсендә, ниләр аша үткәнебезне, барысы да артта калуын аңлап, әлеге җырны сүзсез генә бер-беребезнең күзләренә карап тыңларбыз.

Һәрберегезгә зур рәхмәтләремне җиткерәм, дуслар. Ярдәмегез, терәк булуыгыз өчен рәхмәт! Һәрберегез кадерле! Барысы өчен дә рәхмәт, кадерлеләрем!» — дип язган җырчы.

Инстачылар да иң изге теләкләрен яудырганнар, нык сәламәтлек, сабырлык теләгәннәр.

«Аллаһ сәламәтлек, сабырлык бирсен», «Нык булыгыз. Мәхәббәт могҗизалар ясый», «Бар да яхшы булыр», — дип яза алар.