“Ул кәҗәне мин дә хәтерлим әле” - Чәчкә 24 ел элек булган хәлләрне искә төшергән

“Ул кәҗәне мин дә хәтерлим әле” - Чәчкә 24 ел элек булган хәлләрне искә төшергән
Җырчы Чәчкә синтезаторда уйнап төшкән фотосын куйган. “Бу көйне үзем моңланып уйнап утырдым, үз уйларым белән балачагыма кайтып килдем. Балачак дип әйтеп булса инде”, - дип язган ул.

“1995 елда без гаиләбез белән Чаллыдан Баланлыга (Мөслим районы, әниемнең авылы) күчтек. Әнием бик каты авыру сәбәпле, шунда бетте минем балачагым....

Мәктәптән кайту белән өйдәге эшләр көтеп тора. Ул ашарга әзерләп, аннары табак-савытны юу, салкын суда кер чайкау. Ул ялан хәтле өйне жыештырып та бетереп булмагандыр инде. Ишек алдында Шифа исемле кәҗә, кайчан мине саварлар икән, дип көтеп тора. Тавык-үрдәк ашатасы. Бакча... (Авыл җирендә эшнең чуты юк шул). Әле дәрес эзерлисе. Чаллыда мәктәптә русча укып, авылга күчкәч барлык фәннәр дә татарчага әйләнде. Барысын да башта тәрҗемә итәсең, аңлыйсың, аннары гына дәрес әзерлисең. 

Урамга уйнарга чыгарга вакыт та юк иде инде... Барысын да язып бетерерлек түгел” , - дип авыр хатирәләргә бирелгән Чәчкә.

Җырчы әти-әнисенә бүгенгесе өчен рәхмәт тә әйтергә онытмаган.

“Әйтмә дә инде Лилия, мин ашарга пешерә белмәгәндә, син кыстыбыйлар пешерә идең. Ул кәҗәне мин дә хәтерлим әле. Син бит әле аңа мотороллерда печән дә алып кайтып ашатырга өлгерә идең”, - дип язган җырчының танышы.

 “Постны моңсуланып язгансың, киресенчә, менә бу гомерлек тәҗрибәм миңа "илһам" бирә дияргә иде. Афәрин! Синең кебек тырыш кешеләрне табу читен. Молодец!” – дип комментарий калдырган берәү.

“Бик зур тәҗрибә! Шуның аркасында тормышымның кадерен ныграк беләм. Аллага шөкер итеп яшим”, - дип җавап язган Чәчкә.