Гөлназ Сәфәрованы Чиләбе таксисты талаган

Гөлназ Сәфәрованы Чиләбе таксисты талаган
Татарстанның атказанган артисты, концертлар алып баручы Гөлназ Сәфәрова Чиләбе таксистына пост багышлаган.

"Чиләбе мине шаккаттырды. Мәскәүдән Чиләбегә кадәр 2,5 сәгать очканда йокларга да өлгердем. Мин гадәттә самолеттан чыкканчы ук “Яндекс.Такси”га заказ бирәм. Бүген дә шулай эшләдем. Мин барасы урынга кадәр 30 км күрсәтте һәм 380 сум дип бәяләнде. 

Аэропорттан чыкканда һәрвакыттагыча таксистлар тора. Мин аларга гел автомат рәвештә юк, такси кирәкми дип җавап бирәм. Бүген күзәтеп басып торам. Күңелсез генә ир-ат һәр узып баручы янына килеп, шәһәргә кадәр такси тәкъдим итә. Кемдер аны ишетми дә, ә кемдер минем шикелле автомат рәвештә кире кага. Аның бәяләре ике яки өч тапкыр кыйммәт микән дип кызыксынып куйдым. Минем ничә сум дип соравыма, ул 350 сум дип җавап бирде. Без хәтта бәя дә сорамыйбыз, ә кеше эшсез тилмереп тора дип уйладым мин. Мин “Яндекс.Такси”дан баш тартып, аның белән барырга булдым. Тиешле урынга килеп җиттек, аңа 1 мең сум бирдем. Ә ул “ник 1 мең сум” дип сорады. Мин ваграк акчам юк дидем. Таксист миңа “акчаң җитми” ди. Соң 350 сум дидегез дим. Шул вакыт таксист явыз кешегә әйләнде дә куйды һәм юл бәясе 3150 сум булуын әйтте. Чиләбедә каян мондый бәяләр?” – дип аптыраган Гөлназ.

Берәү “30 сум экономияләргә теләп, алдангансың” дип язган. Ә Гөлназ исә, “мин әле 1 мең сумнан кире кайтарган акчаның 500 сумын гына алып, аны куандырырмын дигән идем”, - дип язган.

Инстачылар арасында да андый хәлдә калучылар бар икән. Алар бу таксистларның алдап акча эшләү ысулы дип язган. 1350 сум белән 350 сум русча бертөрлерәк яңгырашта. Шуңа таксистлар сез ишетеп бетермәгәнсез дип ялганга баралар икән.

Халыкны Гөлназның чыннан да 3150 сум акча түләү-түләмәве кызыксындыра. “Мине янчыгымда бары 1500 сум гына акча булу коткарды. Мин чыннан да таксистның бәясен дөрес ишетмәгәнмен дип уйладым, бәяне төшерүен сорадым. Ул “юк” диде. Шунда мин акча янчыгын ачып күрсәттем, бар булганы шул, башка юк дидем. Теләсә нәрсә эшлә дидем.

Комментарийлар өчен рәхмәт, мошенниклык схемасы икәнен сездән белдем. Хәзер бу хакта күп кеше белде инде. Сак булыгыз!”, - дип җавап язган Гөлназ.