Танылган җырчы Фидан Гафаров һәлакәткә очраган дигән хәбәр дөреслеккә туры килми

Артист хәзерге вакытта өендә булуын әйтә.

21 гыйнварда төрле чыганаклар «танылган җырчы Фидан Гафаров Башкортстанда юл һәлакәтенә очраган», дип язды.

«Башкортстан» телеканалы хәбәрчесе җырчы белән элемтәгә кергән. Артист гайбәтләрне кире каккан.

Ул өйдә булуын, аның барысы да яхшы икәнен сөйләгән.

Шул уңайдан җырчының улы Азамат Гафаров үзенең ВКонтакте челтәрендә дә әлеге борчулы хәбәргә каршы җавабын җиткерде. «Дусларым! Барыгызны да тынычландырасым килә. Минем әтием исән-сау. Фидан Гафаровның автоһәлакәткә юлыгып вафат булуы хакындагы гайбәтне кем (кулын өзеп атасы) тарата икән. Шул юл белән акча эшлиселәре киләдер, күрәсең. Бу хәбәрне ишетүгә үк әтием, «Көтсеннәр менә!», диде. «Дусларым, барысы да ОК», дип җавап калдырган.

Әлеге яман хәбәрне алган тележурналист, үзенең концерт программаларын атаклы җырчы белән бергә оештыручы Ләйлә Дәүләтова да аптырашка калган. Шунда ук яраткан артистына шалтыраткан ул. Бу турыда ул үзенең Инстаграм сәхифәсенә дә язып куйган. «Дусларым бу хәбәрне ишеттегезме? Сезгә дә шундый смс килдеме? Миңа биш минут эчендә 100 ләп шундый смс һәм биииик куп танышлардан-дуслардан "ишетеңме? дөресме?" дигән смслар килде! Моны ишетүгә Фидан абыйга шалтыраттым! «Сез чыннан да үлдегезме әллә?» дип сорадым. Бу хәбәр дөрес түгел!

Көлә-көлә сөйләште, исән-сау мин, чәй эчеп утырам, диде. Үзем дә ишеттем, әллэ дөрес микән дип, шикләнә үк башлаган идем диде. Не дождутся, дип тә өстәде! Аллага шөкер, Фидан абыебыз исән -сау җәмәгать! Мондый хәбәре чыккан кешенең гомере бииик озын була диләр. Амин!», дип язган виртуаль дусларын тынычландырып Ләйлә.