«Диңгезме , дуңгызмы?» — Илсөя Бәдретдинова төркемендәге якут кызын татарча өйрәтә
Айысхаана кайвакыт сүзләрне бутап, бик кызык итеп тәрҗемә итә.
Илсөя Бәдретдинова үзенең төркемендә эшләүче Айысхаана исемле якут кызын татарчага өйрәтә. Укыту процессын сторисларына төшереп, инстаграмда утыручыларга да күрсәтеп бара ул. Айысхаананың сәләтле кыз икәне ярылып ята — ул әллә никадәр татар сүзләрен ятлап өлгергән инде. Дөрес, кайвакыт сүзләрне бутап, бик кызык итеп тәрҗемә итеп куя.
Бу юлы да: «Родник — чишмә, холодный родник — салкын чишмә», — дип, җырчының сорауларына шома гына җавап биреп бара. Ә менә Илсөя, киресенчә, сүзнең татарчасын әйтеп, русчага тәрҗемә итәргә кушкач, югалып кала. Диңгезне тиз генә «дуңгыз»га әйләндерә. Артистлар бергәләшеп көлешәләр.
Ә менә атнадагы көн исемнәрен бер ялгышмыйча әйтеп бирә. «Мин молодец», — дип үзен мактап та куя.
Афәрин, Айысхаана!
Биредә Айысхаананың җырчы Илназ Гарипов белән бик җылы мөнәсәбәтләрдә булуы турында язган идек.
