Руслан Кираметдинов хатыны Ильмира Нәгыймова белән аерылышуларын кире кага | intertat.tatar

Руслан Кираметдинов хатыны Ильмира Нәгыймова белән аерылышуларын кире кага

Җырчы сүзләренчә, Ильмираның инстаграмын хейтерлар урлаган.

Җырчы Ильмира Нәгыймова ире Руслан Кираметдинов белән аерылышуы турында хәбәр иткәч, без җырчыларның икесе белән дә элемтәгә керергә тырыштык. Ильмирага чыга алмагач, Русланга шалтыраттык. Ул әлеге сүзләрнең дөреслеген кире какты. Аның әйтүенчә, Ильмираның инстаграм сәхифәсен хейтерлар «урлаган».

«Бөтен булган әйберләрне телефоннан чыгарып, сторисларга куйганнар. Инстаграмга керә алмыйбыз. Болар бөтен дөньяга таралды хәзер. Иртәгә бу сүзләрне кире кагуыбыз турында видео төшереп урнаштырачакбыз.

Фото-видеоларның берсендә дә минем йөзем күренми. Берсе дә дөрес түгел. Скриншот белән күрсәтелүче фотолар — телефондагы әллә кайчангы фотолар. Безнең мөнәсәбәтләребез Аллаһка шөкер, без ике бала үстерәбез. Кеше шундый әйберне гаиләдән чыгара аламы соң инде, үзегез уйлап карагыз?» — дип җавап бирде ул.

Телефонын алмаса да, соңрак Ильмира «Интертат» хәбәрчесенә: «Не взломали. Кичә телефонда утырмадым, белмим дә», — дип җавап язды. Сторисларның дөресме, юкмы икәнлеген әйтмәде. Алга таба әлеге хәлләргә ачыклык кертергә тырышачакбыз.