Зөлфәт Зиннуров Салават Фәтхетдиновның туган көненә биргән бүләген күрсәткән

Зөлфәт Зиннуров Салават Фәтхетдиновның туган көненнән видеолар куйган.

«Абзыйның туган көне шәп үтте! Чөнки шәп кешеләр җыелган иде. Нәрсә бүләк итәргә дип аптырап йөрдем башта, аннан, «үз кулларың белән эшләнгән бүләк — иң яхшы бүләк дигәнне истә тотып», үзем җыйган каен себеркесе һәм каен суы бүләк иттем», - дип язган ул.

Кыш уртасында каен суының каян килүе инстачыларны да кызыксындырган. «Каен суы дигәне чынлап та каен суы идеме, әллә берәр аппарат аша чыгарып әзерләнгән продукт идеме?», «Кызыктырдыгыз, каен суын ничек сакларга, язып җибәрә алмассыз микән», «Уйлаган идем, Зөлфәт мөгез чыгармый калмас әле дип. Беркем алып килеп бирә алмаган бүләк тоткан!!! Хуш исле, җәй исе килеп торганын», дигән комментарийлар калдырганнар.

Халык бәйрәмнән видеолар белән уртаклашкан өчен Зөлфәткә рәхмәт әйткән, Салаватка матур теләкләр язып калдырган.

«Менә артист халкын шулай бергә дус булуларын күрү бигрәк күңелле. Алайса һаман бер — берсеннән җыр урлаганнар дип, елашып, талашып йөргәннәрен генә күрсәтәләр»;

«Эх, качып кына булса да ярты сәгать шушы атмосферада утырып чыгырга. Алдан белгән булсам, бәлеш тотып, бәлешкә заказ биргән идегезме, дип килеп чыккан булыр идем. Тагын шундый чара булса, шыпырт кына сызгырырсыз әле»;

«Бигрәк күңелле утырасыз. Салаватның туган көне елда шулай күңелле уза. Бик кунакчыл, ачык кешеләр икәнлекләре күренеп тора»;

«Салаватта кунакта булган кебек булдым».

«Ул татарга шаклар катам, артист тормышын тикшерүдән тыш, эш таба алмыйлар», дип комментарий язучыга да җавап бирүче табылган.

«Артист тормышы белән кызыксынмыйча, без колхозчылар белән кызыксынмаслар ич инде, аларны мин менә чын күңелемне биреп карыйм, ферма, тирес кемгә кызык инде», — дигән берәү.