Сөмбел Заһидуллина: «Ул видеоны мин кызган чагымда төшердем. Гафу үтенәм!»

Сөмбел Заһидуллина үз әтисен аны кыйнауда гаепләгән иде.

Җырчы Сөмбел Заһидуллина «Интертат» аша мөрәҗәгать итте:

«Татарстан гына түгел, бөтен ил буенча таралган видео. Ул видеоны мин кызган чагымда төшердем. Гафу үтенәм!

Әти белән мөнәсәбәтләребез яхшыланып китте. Начар да булмады.

Мин үзем кызу канлы. Һәм монда беркемнең дә гаебе юк. Кемдә аңлашылмаучанлыклар, кычкырышлар булмый икән? Булса да, кеше аны сөйләми, видеолар төшерми икән. Ә менә мин ялгыштым һәм моңа үкенәм. Бу адымым минем өчен бик зур сабак булды!

Чәйнәдегез, рәхәтләндегез!.. Язылучыларымның саны бермә-бер артты. Кем нәрсә генә язмады. Кешенең язмышыннан көлү ансат инде ул. Тиз арада түбәнсетеп, чүплеккә ыргыттыгыз. Сезнең гаиләләрегездә бер дә тавыш чыкмыйдыр, күрәсең.

Ул көнне ниләр булганын сорамагыз. Сөйләмим. Ул безнең гаиләбез! Сезгә уңышлар телим! Бәхетле булыгыз!»