Рәфинә Ганиуллина: “Əниегезне ямьсез киендергәнсез, һаман сөйләшмимени?” диючеләргә исем китә

Җырчы Рәфинә Ганиуллина үзенең Инстаграм челтәрендә балачагындагы авыр мизгелләрне искә алган. 

“Иң якын кешеләрең - бертуганнарыңның терәген тоеп яшәү - бик мөһим. Əлбәттә, бу бөтен гаиләләргә дә хас дип әйтмәс идем, монда безнең кечкенәдән, әнидән башка таяныр кеше булмау да сәбәпче булгандыр, ул безне бер йодрык итеп үстерде. Киемнәр өчен сеңелләрем белән сугышкан чаклар да булды, әни әйтә торган иде: "аягымнан тотып селкесәгез дә акча җиткереп булмый" дип, шуны белеп үстек, артыкка өмет итә алмадык. Тизрәк акча эшли башлап әнине рәхәттә яшәтү хыялы белән план корган чакларыбыз истә”, - дип язган ул.

Хәтерләсәгез, җырчының әнисе Зөлфия Мансур 2016 елда инсульт кичерде. Ул вакытта табиблар аның бары 3-4 ай гына гомере калган дип әйткәннәр.

“Хәзерге заманда, нормаль әти-әниләр балаларына бик булыша, фатирын да алып бирә, укыта, туйлар ясый. Без барысын да үзебез булдырдык, әти белән әнидән акча сорау бөтенләй башка сыймаслык күренеш. Əти дигән кешебез биш кызын ташлап киткәнгә 25 ел булды, аның өчен оят булса да әйтәм, шуннан бирле без әнинең 2 төркем инвалидлык пенсиясенә яшәдек, әнигә ул вакытта 42 яшь, миңа 9, төпчек балага 2 яшь, әтидән бер тиен ярдәм булмады, типсә тимер өзә ала торган ир-ат, типмәде генә... 

Аллага шөкер, хыялыбыз чынга ашты: әнине чит илләргә дә йөрттек, фитнеска абонемент, ноутбук, яхшы кием - бәйрәм саен затлы буләк белән сөендерәбез үзен. Кызганыч, 2016 елның көзендә инсульттан соң әниебез сабый баладай зәгыйфьләнде, бүгенге көндә безнең тәрбиягә мохтаҗ, врачлар баш миенә операция ясап әнине үлемнән алып калдылар, тагын 3-4 ай яшәргә мөмкин диделәр. Көзгә 3 ел була, бу безнең бердәмлекнең көче дип уйлыйм”, - дип язган Рәфинә. 


“Əниебезне бүгенге көндә дә концертларга, театрга, рестораннарга алып барабыз, "Əниегезне ямьсез киендергәнсез, һаман сөйләшмимени? Җитәрлек шөгыльләнмисез, димәк! Яисә сетевой маркетинг аша үлемнән алып кала торган "чудопрепарат" тәкъдим итәләр 40-50 меңгә, әниегезгә шуны алып бирә алмыйсызмыни? Акча эшлисез бит сез!" - дип әйтүчеләргә исем китә. Безнең әниебез кадер-хөрмәткә бик лаек, без моны бик яхшы аңлыйбыз! Кайвакыт сүзләр артык”, - дигән җырчы.