"Кызганыч - тирә-якта бик күп намуссыз кешеләр бар". Элвин Грей Гүзәл Уразованы "Красивая, хороший" җырына авторлык хокукларын үзләштерүдә гаепли

"Якын кешеләр тарафыннан хыянәтне кичермим", - дип яза Радик Юльякшин.
"Гүзәл Уразова, тәрҗемәче Сафина белән берлектә, Россия авторлар җәмгыятенең җирле бүлеге аркылы "Красивая, хороший" җырына авторлык хокукын сәер генә үзләштерде. Аны без Бабек Мамедрзаев белән сезнең өчен әзерләгән идек. Мин хөрмәт иткән башкаручы буларак, Гүзәлне дуэт башкарырга чакырдык", - дип яза Радик Юльякшин. 

Ул бу җырга авторлык хокукларын үзләштерүдә җинаять билгеләре бар дип әйтә.

Радик Юльякшин Башкортстанда да авторлык хокукын үзләштерү очрагы булуы хакында яза. Җырчы Гөлнара Рәшитованы һәм Россия авторлар җәмгыятенең Башкортстан бүлеген гаепли. 

"Алга таба нәрсә булачагын мин сезгә соңрак хәбәр итәрмен. Минемчә, монда җинаять маддәсе бар. Кызганыч, хакыйкать шундый - тирә-якта бик күп намуссыз кешеләр һәм алардан сакланырга, судта хокукларыңны якларга туры килә. Авыр һәм күңелсез... Моңа нинди нәтиҗә ясарга була... Коллегалар, сез нишлисез соң? Минем ... турындагы сүзләр дөрес түгел. Мин исән, сәламәт һәм сезгә дә шуны телим. Мин моны атлап үтәчәкмен һәм алга китәчәкмен. Ә сезгә моның белән гомер буена яшисе", - дип яза Радик Юльякшин.

Элвин Грейның Гүзәл Уразова белән башкарган дуэты зур популярлык казанды. Җырчылар арасында беренче конфликт быел яз чыкты. 21 мартта "Дуслык күпере" фестиваленә багышланган матбугат конференциясендә Гүзәл Уразованың ире Илдар Хәкимов Элвин Грейның популярлыгы озак бармаячак дип белдерде. Моңа җавап итеп Радик Юльякшин Илдар Хәкимовны икейөзлелектә гаепләде. "Үзегезнең талантлы хатыныгызга сәлам әйтегез", - дип язган иде Элвин Грей.